政情：張永霖珍藏吳冠中畫作
有「青樓名妓」之稱嘅前亞視主席張永霖（Linus），一向愛好收藏古董名畫同名錶，講起中國當代著名畫家吳冠中上月逝世，Linus感到相當惋惜，佢話十幾年前有幸同吳冠中見過一面，至今仍記憶猶新。
自嘲無業無收入
原來Linus幾年前買咗一幅吳冠中嘅十吋乘十吋山水畫，一直珍而重之，如今會更加珍惜好好收藏，唔會理幅畫升唔升值喎！
Linus自從離開亞視後，多咗時間玩番佢心愛嘅名畫同名錶，但自嘲家陣無業無收入，就算遲吓去蘇富比拍賣會都係睇吓，未必會競投，主要係想同班老友交流吓玩古董心得。
Linus又話，近年啲名畫愈來愈貴，皆因內地經濟起飛，人民富裕起來，自然對名畫多咗留意同重視，變成賣價提高，出價又高，唔貴都幾難。Linus買錶買畫志在收藏，價錢升高自然要買貴嘢，又難怪佢呻嘅！