政情：慳電膽券隨時流產

慳電膽一百蚊現金券計劃係舊年施政報告嘅產物，原定今年二月派發，但係因為掀起煲呔曾益親家醜聞，成件事一鑊泡咁，話要重新研究，一研就延足半年。醜事密冚，煲呔曾梗係想側側膊唔提啦，拖得就拖，換取時間畀呢塊政治大傷疤慢慢愈合埋口吖嘛。

不過，其實好多家庭都用慳電膽，大家又點會唔記得？公民黨余若薇尋日喺立法會提書面質詢，問慳電膽回收情況，又無意中提醒大家，煲呔曾仲有慳電膽醜聞未解決，欠公眾一個交代！本來，今年四月期間，環保界一度盛傳慳電膽券再出台，但最終不了了之，轉眼又過兩個月，煲呔曾仲想拖到幾時？唔通想等到十月施政報告，即係慳電膽醜聞一周年先至公布？

無意撤銷 繼續研究?!

我哋尋日向政府中人了解情況，得到嘅回覆係，慳電膽券「永遠唔會難產」，即係政府無意撤銷計劃，總之繼續研究。但係仲要研究啲乜嘢？該位政府中人又講唔出所以然，大家話係咪好弔詭呢？慳電膽醜聞一役，曾經喺巨大社會壓力下「以身護主」嘅環境局局長邱騰華，近日為停車熄匙爭議自身難保，應接不暇，睇個勢，慳電膽券喺短期內都好難重見天日囉。

特區政府其實患咗思考遲緩症，慳電膽券政策本身最大嘅漏洞，係市民左手收慳電膽券，右手要加電費，政府一直諗緊嘅，係點樣令用戶唔使加電費，其中一個方向係由公帑支付。但係羊毛出自羊身上，政策一落筆就打三更，政策無論點實施，市民都唔慌有好印象。

煲呔曾甘做鴕鳥，唔代表市民都眼矇耳聾，只要聽到「慳電膽」三個字，煲呔曾就會被人翻醜聞舊帳。佢欠市民嘅，唔止係慳電膽券，仲有益親家嫌疑令人接受嘅解釋，總之係講極都講唔清。