中環出更：馮令儀鍾情廿蚊玫瑰戒指
女人扮靚，除咗衫褲鞋襪頭髮手袋之外，裝飾用嘅小飾物都絕對係加分嘅一環，不過唔係貴就代表好，品味並非單單用銀彈就可以堆砌出嚟。行政會議成員梁智鴻啱啱先攞咗大紫荊勳章，佢嘅太太馮令儀戴住廿蚊一隻嘅紅玫瑰花戒指，一樣可以艷光四射。
梁太早幾日經過中環，見佢一身黑衣打扮，但係右手無名指隻紅色戒指就相當搶眼。梁太話隻戒指係佢之前陪朋友行珠寶展時買，佢一見到就好鍾意，而且相當抵買，廿蚊就有交易，所以即時買咗兩隻。
梁太貴為香港嘅放射診斷學女王，但佢從來唔愛名牌，反而唔值錢但花心思同與眾不同嘅手作仔更加得佢歡心。佢同梁智鴻衣着都唔浮誇，好似金刀梁最愛嘅皮鞋款式，每對只賣六十蚊，可惜已經絕迹。