中環耳目：施榮忻自創醬料歎崩沙腩
百仁基金主席施榮忻（Jaime）近年公務活動爆棚，經常忙到食冇定時。有日下午兩點幾，卓妮見佢一個人光顧灣仔華南粉麵茶餐廳，原來佢細細個就開始幫襯啦！依家每星期都會嚟兩、三次，歎吓佢至愛嘅清湯腩米粉。
當日Jaime叫咗一碗清湯腩米粉，另加三元將牛腩轉做崩沙腩，跟住又叫咗碗淨牛丸。佢仲即時同卓妮示範自創嘅醬料，話用嚟點牛腩同埋牛丸食就至正啦！炮製嘅秘訣係兩茶匙辣椒加小量豉油，再撈埋兩茶匙嘅清湯汁就得喇！
餐廳老闆陳光偉話，崩沙腩數量唔多，每日只夠賣三、四客，如果客人識食嘅話，只要加三元就可以轉。Jaime果然係識食之人。Jaime又自爆話，細個同父母喺餐廳附近嘅福臨門食飯時，佢成日掛住華南嘅清湯腩，所以父母會幫佢叫外賣去福臨門添！