中環出更：楊哲寧開舖賣貴族皮鞋

素有「皮鞋王子」之稱嘅Jonathan經營鞋業生意七年，客似雲來，月前投資數百萬元，同前自由黨副主席周梁淑怡（莎姐）二女婿袁正文拍檔，齊齊賣尊貴靚鞋。其中一個牌子，係連英國查理斯王子都着佢嘅Edward Green。而全店鎮店之寶係Edward Green Dover系列小牛皮深啡色鞋（圓圖），盛惠八千七百五十元。

呢個牌子喺英國有逾百年歷史，設計師擅長玩顏色。Jonathan即場做生招牌，着上一對價值八千二百五十元嘅啡色Edward Green皮鞋，細佬楊哲安同爸爸Howard都加入Edward Green行列。Jonathan分享保養皮鞋心得，就係每次着完後要用鞋撐，每隔兩日亦要交替着吓其他鞋，等對鞋抖抖。

袁正文（左）有份投資鞋店，太太周智琪榮升鞋店老闆娘，笑逐顏開。

黃宜弘（右）一身白馬王子look，劉健儀都忍唔住望多兩眼。 （徐家浩攝）

莎姐推銷 田少唔受

愛着靚鞋嘅旅發局主席田北俊都嚟湊熱鬧，莎姐代女婿招呼田少，向佢推介一對Loafer鞋，點知田少嫌鞋底唔夠軟：「我着鞋一定要軟熟，揸車時至容易感應到油門。」尋日佢就着咗對Salvatore Ferragamo，仲搞鬼地踩咗卓妮一腳，證明對鞋真係超軟熟喎。

楊哲寧（中）鞋店開幕，細佬楊哲安、弟婦張燊悅、媽媽及爸爸楊孝華齊撐場。 （楊哲寧提供圖片）

放大圖片

田少又攞起鞋架上一對價值六千元嘅美國經典品牌Alden黑色綁帶boot，向身邊嘅自由黨副主席方剛話：「對鞋夠硬淨，啱晒你着去立法會開會同人『片』過噃。」方剛咁官仔骨骨，又點會出到踩人、掟鞋呢招呢？