政情：劉慧卿累張文開夜車
白鴿黨同中央談判繼而轉軚，畀社民連捉住嚟鬧，話佢哋同中央有枱底交易、搞密室政治，總之幾難聽嘅說話都有。白鴿黨早前為表清白，應承寫報告向公眾交代同中央嘅談判過程，免再畀人抽水。立法會議員平常點會自己執筆寫報告？張文光尋日就大呻自己為咗寫報告而捱夜，仲話短短幾日間，份報告已經寫到第七稿。點解？原來係因為黨友劉慧卿好帶挈！
張文尋日話，雖然佢只係由上星期六先開始寫報告，但至今已經要寫到第七稿，又自爆平時最多只係寫兩稿就交得貨，今次同一份報告改七次，真係成世仔都未試過喎。佢解釋，因為份報告要交代晒主席何俊仁、劉慧卿同佢自己與中央會面嘅內容，要將三人行程、事實同記憶夾埋一齊，都幾費力，「阿姐（指劉慧卿）有時記得有嘢未講晒又話要加，尋晚先畀第六稿佢睇，今朝就同我講要寫第七稿！」張文講笑話，分分鐘佢寫到第十稿都「未埋到欄」。
民建聯尋日舉行成立十八周年酒會，劉慧卿都有「踩場」，有人講笑話，佢唔知係咪嚟吸民記嘅中間票。