政情：立會擬踩三日傾最低工資
立法會開埋下個星期三嗰次大會就開始放暑假，不過黎明來臨之前總係較為黑暗，事關極具爭議嘅《最低工資條例草案》將會喺嗰日恢復二讀。立法會主席前排都打開口牌話預咗到時要開足三日會，原來佢私下問過議員三日都唔完點算。點算？星期五開通宵，開到完為止囉。
七月十四日嘅大會本來已經有唔少嘢，好似增加豪宅印花稅嘅法例又係呢日恢復二讀，仲有民主黨李永達要求出動尚方寶劍《立法會（權力及特權）條例》，要求政府交出地政總署就天匯問題同恒地來往嘅書信，雖然政府喺前日已經交咗啲信出嚟，但若果李永達硬要再出動特權法，相信到時又有排拗。
工聯會王國興話，早兩日立法會主席問過佢，萬一下星期嘅大會開到周五都未開完點算？王國興就話一於直踩落去，總之踩到完為止，直頭要豁出去。相反泛民主派就樂觀啲，職工盟李卓人話大會好似未試過搞到星期六都要開，相信即使最低工資好長氣，照計都應該三日就ＯＫ。睇嚟下星期嘅大會將會係今個立法年度內，繼政改之後嘅另一個亮點。