政情：英巴出局肥胡轉投德軍
世界盃足球賽進入四強大戰，好多球迷熱捧嘅勁旅一早被淘汰，但唔少城中名人好快有新歡，好似明日凌晨兩點半上演嘅西班牙對德國，原本支持英格蘭同埋巴西嘅醫管局主席胡定旭，已「移情別戀」轉捧德國隊，仲決定漏夜觀賽力撐添！合和集團太子爺胡文新（Thomas）原本熱捧意大利，依家轉做西班牙粉絲。究竟雙胡邊個會笑到最後，天光就揭曉啦！
胡文新焗撐西班牙
尋晚喺一場酒會上，城中名人熱話世界盃。肥胡話，世界盃開波以來佢差唔多場場都睇，佢係英格蘭隊嘅支持者，點知英格蘭好快執包袱返鄉下。依家佢睇好德國隊，明日凌晨決定觀賽以示支持。雖然要捱到半夜兩點半至有得睇，但肥胡話平時慣咗夜瞓，所以冇咩大問題。原來佢晚晚應酬完返屋企，都會跑步運動一小時，大約點幾鐘至上床，係「夜貓子」一族。
Thomas就話，如果有得瞓一陣先，佢就會起身撐西班牙，否則明朝睇番重播嘅精彩片段算數。Thomas原本係意大利擁躉，無奈意大利出局，依家惟有轉投西班牙懷抱。
恒隆集團候任董事總經理陳南祿同肥胡一樣睇好德國隊，佢希望冠軍賽見到德國對荷蘭，但都要睇吓荷蘭打成點先！