政情：民記捧新星出戰超級區會
二○一二年立法會選舉新增五個「超級區議會」功能界別議席，引起各黨覬覦。正當民主黨同公民黨磨拳擦掌、密謀由黨魁級重量級人物落場爭逐之際，喺地區坐擁龐大鐵票嘅民建聯卻玩逆向思維，諗住利用呢場超級戰役，當成造星捷徑，好似泵氣球咁快速催谷黨內第二梯隊，而民建聯新星、沙田區議員葛珮帆以頭位出戰嘅呼聲甚囂塵上。
補償○八立會選舉
一二年五個超級區會議席極有可能以全港一個大選區，透過比例代表制選舉產生。戰線長，聲勢勁，勢成選舉焦點。按常理，為求勝算，各黨理應派出最具知名度人物出戰。不過，民建聯高層就有另一個算盤。
民記高層計過數，有權喺選舉中投票嘅選民為三百二十萬人，以往年投票率五成左右計算，即一百五十萬名選民，五個位攤分，即每張名單攞二十萬票就穩勝。○八年立法會選舉民記僅喺新界東同新界西，得票已經約二十萬張，即一二年派邊個出戰爭議席，都能「坐一望二」，橫豎贏梗，不如益吓班後生。民記主席譚耀宗尋日宣布，同香港專業進修學院合辦「新一代政治專才文憑課程」，歡迎外人參加，都係想吸新血啫。如果可以將超級議席拱手讓畀班第二梯隊，對吸納有志從政嘅後生仔嚟講，吸引力大十倍都唔止啦。
民記內部流傳，若以新人出戰超級議席，葛珮帆呼聲最高，事關○八年立法會選舉期間，已盛傳葛有機會跟劉江華出戰新界東，但最後協調結果翻盤，本想空降港島嘅陳克勤回巢新東，葛珮帆焗住再等四年，一二年都應該補償番畀佢嘞啩。至於民記內部其他等上位嘅第二梯隊，好似副主席張國鈞、荃灣區議員陳恆鑌同深水埗區議員鄭泳舜咁，都有望喺參選名單排隊，當中尤以陳恆鑌機會較大。最後結果如何，就睇佢哋嘅造化。
其他政黨情況又點呢？自由黨繼常委田北辰表態無興趣爭逐超級議席後，佢大佬前主席田北俊尋日亦話，如果後生十年就會去選，事關要先選到區議會先有資格參選，話晒猛虎不及地頭蟲，政治明星都分分鐘唔夠班同地頭蟲砌。言下之意，即係要諗過先。民主黨就忙緊撰寫公開同中央溝通過程嘅報告，得閒死唔得閒病，遑論討論出戰超級議席人選。