中環出更：田少自駕遊尋訪法國酒莊
自由黨前主席田北俊夫婦去年暑假參加Porsche Travel Club（保時捷旅遊俱樂部）嘅法國南部自駕遊豪華團，卓妮至今仲記憶猶新。話咁快又一年，田少玩過翻尋味，上月再度組團出發，豪玩跨境自駕遊，由法國巴黎開車到西班牙巴塞隆拿，沿途參觀咗Burgundy（布根地）同Bordeaux（波爾多）兩大釀酒區，去到波爾多左岸嘅Lynch Bages（靚次伯）酒莊嗰陣，更獲少莊主Jean-Charles Cazes親自接待。
跨境遊西班牙
「波子」跨境自駕遊由上月二十日至廿五日共六日行程，除兩部領航車外，今年共有九部車出發，大部分參加者都係過去同田少一齊玩過自駕遊嘅朋友，由於玩得痛快，於是一齊研究旅遊路線，再交由保時捷方面安排。據聞保時捷專程搵領隊預先喺五月行一次「踩線」，確保行程暢順，代價係每人團費由去年嘅五千歐元加到今年六千歐元，折合港幣約五萬八千元。不過依家歐元平咗好多，計落唔差得幾多。
田少同太太Mary、愛兒啟文喺上月十九日抵達法國巴黎，入住Hotel Ritz Paris一晚，翌日跟隨車隊浩蕩出發。車隊先去睇Burgundy，包括位於Beaune附近嘅Chateau de Pommard酒莊。田少話，酒莊地下酒窖嘅藏酒較新，入咗樽但未貼上招紙及入箱。車隊之後繼續向南走，入住Chateau de Codignat嘅Hotel Bort l'Etang古堡，古堡四周風景優美，田少兩公婆都攬住影番張合照。
第三日車隊向波爾多進發，到訪港人好熟悉嘅Lynch Bages酒莊，仲得到少莊主Jean-Charles Cazes熱情接待，大家即場品嘗酒莊佳釀。雖然Lynch Bages屬五級酒莊，但品質卻屬超水準之作，著名酒評家Robert Parker曾指該酒莊水準達二級水準，部分年份更達一級水準。最後兩日車隊過境到西班牙，分別到Bilbao及Barcelona，二十六日上機返港。
總結今次旅程，田少話，開六日車總共行咗二千公里，過足車癮，但最開心係愛兒啟文肯應承一齊去自駕遊，原本叫埋新抱一齊同行，但因為新抱要留港照顧女兒，所以無辦法跟埋去，佢希望孫女長大後可以一齊再去多次喎！