中環出更：何鍾泰戴父傳古董OMEGA
名錶，總係代代相傳。立法會工程界代表何鍾泰都有隻家傳之寶。隻錶係已故父親戴開，然後轉贈畀佢，係OMEGA星座錶（Constellation）。錶身經歷幾十年風霜，睇落已花花哋，但爸爸憑錶寄意，親情濃得化不開，何鍾泰戴到今日，依然唔捨得換錶。
卓妮早前喺香港會門口撞見何鍾泰，見佢手上戴住隻古董錶，手錶背後原來有段古嘅。何鍾泰話，呢隻係OMEGA五、六十年代款式，當年爸爸以五百蚊買下，以當年物價指數計算，一啲都唔平。有日爸爸想換錶，於是將舊錶轉贈兒子。唔經唔覺，隻錶已跟咗何議員幾十年，銀色錶身難免留下多條花痕，但依然準確無誤。最近去英國旅行，佢仲花咗三英鎊幫隻錶換上一條彈弓錶帶。
OMEGA喺瑞士錶壇締造無數傳奇，星座錶喺1952年相繼面世，其優良品質及精確運行，除咗奠定OMEGA品牌形象，亦成為古董錶發燒友渴望收藏嘅對象。
