政情：老鼠橫行 梁美芬要出招
老鼠橫行之日，正係「鼠王芬」立法會議員梁美芬出動之時！鼠王芬自掏腰包印製四千本《滅鼠天書》派街坊，前日派完畀街坊，尋日一口氣跑勻深水埗北河街街市、保安道街市同紅磡街市派書，出沒頻率高過佢要對付嘅老鼠。
鼠王芬兩年前請「廣州鼠王」李鏡就入九龍西捉鼠，十七隻又大又肥嘅老鼠落網，令鼠王芬成功上位。近期老鼠又橫行香江，發生多宗老鼠咬人事件，鼠王芬亦乘勢出動，稍後會再聯絡內地捕鼠專家嚟港捉鼠，尋日派住《滅鼠天書》先，教商販滅鼠四十八式，等大家暫時止住咳先。
鼠王芬要對付老鼠，先狙擊政府，狠批政府無提供二十四小時收鼠服務，街坊捉到老鼠都唔知點處理。仲有，政府捉鼠嚟嚟去去得三招：落老鼠藥、培訓員工同口口聲聲話要提高社區滅鼠意識，人哋廣州就手法靈活得多，除咗落藥，仲會用老鼠膠捉老鼠。鼠王芬話老鼠見同伴出事，會奔走相告㗎！鼠王芬果然名不虛傳。