政情：單雞護家眷唔撐黨友
民主黨副主席單仲偕（
雞）喺過去一個月民主黨最風雨飄搖嘅日子，同家人飛咗去南非睇世界盃，搞到唔少黨友有微言。前日佢終於返港，不過佢返嚟後第一個重要會議，都唔係同黨友開，而係出席尋日嘅西九管理局董事局會議，怪不得班黨友咁嬲佢喇！
雞同我哋講，佢早喺大半年前就買咗票去南非睇波，後來政改問題峰迴路轉，個黨面臨嘅壓力愈嚟愈大，佢都諗過提早返港，但由於南非治安真係好差，佢哋喺當地租架車都試過畀人爆玻璃偷嘢，佢唔放心掉低太太同兩個仔，先至無返港同大家共患難喎。對於黨友投訴佢連電話都冇打過返嚟慰問吓，佢就話喺南非打長途電話返港，每分鐘要成十幾蚊，相信黨友會理解佢喎。