政情：蘇菲梁硬銷功能組別
經濟動力立法會議員梁劉柔芬兩年前成立「社區導者學會」，早前仲出咗本叫《選舉》嘅書講香港政治。尋日佢以學會召集人名義去咗間中學，同中學生談功能組別。遇到學生質疑功能組別時，Sophie不斷反擊，力陳功能組別嘅好處。佢咁做，擺明係搭台畀自己，為功能組別護航。
白鴿黨嘅李華明同民記嘅李慧琼尋日都嚟撐Sophie嘅場。有個學生就問Sophie，功能組別嘅選民基礎咁薄弱，究竟佢知唔知實際選民有幾多。本身為紡織及製衣界別嘅Sophie即刻面色一沉，話自己知道係得廿幾萬選民，但反指依家《選舉》呢本書係由佢呢位功能組別嘅議員提出，希望同學唔好淨係睇選民基礎呢樣嘢，要留意吓佢哋嘅工作同貢獻喎。
李華明喺活動上講，佢喺九龍東，攞四萬八千票當選，Sophie喺佢嘅界別都攞四千幾票㗎，暗諷Sophie選民基礎狹窄。事實勝於雄辯，有啲嘢，係事實之下，不如就唔好雄辯喇。