政情：女村長人少卿姐甚不滿
尋日立法會民政事務委員會用咗成個上晝去探訪屯門同元朗嘅女村長，諗住了解一下女性參與素來由男士主導嘅鄉郊事務，點知有份去嘅三位議員當中，只得民主黨劉慧卿一位女士。公民黨陳淑莊（Tanya）本來報咗名參加，點知原來佢同立法會秘書處之間有小誤會，所以最終無出席。
佢哋一行人先去陶淵明後人居住嘅屯門青磚圍，拜會該村村長陶錫源，同埋屯門新村村長黃惠弟以及楊小坑村村長陳慧儀，之後佢哋又去元朗拜會該區十幾位婦女會成員。劉慧卿對於依家一千三百幾位村長得廿幾個係女性甚為不滿，揚言將來要翻幾番，身為女士嘅民政事務總署副署長李美美都話，當局會加強宣傳，希望出年一月嘅村代表選舉多啲女士參與。
民政事務委員會入面嘅女議員原本仲有經濟動力梁劉柔芬同埋公民起動何秀蘭，委員會有二十人，女議員佔咗五分一。其實民主黨經常被人批評，話佢哋嘅女性參政率特別低。