政情：譚偉豪踩政府I.T.Out爆

I.T.豪話，煲呔曾最應該開facebook，收集民情，但係煲呔曾早前為谷政改方案，喺facebook設「起錨」群組，就抵鬧到痹！好簡單，政府將煲呔曾同高官落區嘅短片鋪天蓋地擺上網，但拍攝手法生硬，一味叫高官講出撐政改理據，更加無互動。咁Out嘅手法，教育電視都再唔用啦！又Hard sell到痹，毫無編排，I.T.業界睇咗都噓到爆。

副局政助網頁 死氣沉沉

鬧還鬧，I.T.豪好同情班開咗facebook交差嘅副局長同政助，好似民政事務局副局長許曉暉同教育局政治助理楊哲安咁。I.T.豪話，呢班政治新丁其實係I.T.界苦主，事關政府對I.T.無一個有系統策略，亦無技術支援，佢哋嘅facebook淪為個人履歷介紹同發放官方活動照片嘅網頁，死氣沉沉，完全起唔到同青年人交流作用。

I.T.豪話，好難怪班新丁，因為如果被網民質問政治敏感嘅問題，叫佢哋即時回應，等如政治自殺，提早了結政治生命。所以，政府應該訂定一套I.T.政策，好似教路點樣去收集問題、用乜嘢標準同方式篩選問題作答、幾時回覆咁，仲有，高官要有胸襟，唔好吓吓都黑面示人，呢樣嘢最緊要，唔係畀人「洗板」（批評充斥整個留言板）嘅時候，就唔好怪人嘞。

I.T.豪話，網上問責，有助施政，同樣有助政黨開拓空間。佢篤爆曾經介紹人畀廠商會代表林大輝搞「C18」網頁，人哋收費兩、三萬元，大輝嫌貴，問兩千元得唔得，好似寫網頁唔使錢咁。I.T.豪話，「我嗰個都要幾萬蚊喇！」