中環耳目：顏福偉茹素首選功德林
咪睇「白花油王子」、和興執行董事顏福偉（Stephen）身形健壯，以為佢實係識食識歎嘅潮人一族，查實佢食得好簡單、好清淡，只差未正式戒肉食齋。佢嘅午餐只需兩杯果汁就搞掂，如果同朋友聚會，首選食肆就係上海素菜功德林啦！
Stephen經常幫襯銅鑼灣功德林，必食之選包括芙蓉炒桂花翅、青菜煨麵同生炒魚片。芙蓉炒桂花翅其實係蛋白撈埋素翅落鑊同炒，至於生炒魚片嘅魚片係批咗黑色皮嘅冬菇，食落好似魚片咁爽滑，再加埋木耳一齊炒，就成為一道既健康又好味嘅佳餚。
Stephen話佢年紀漸長，唔需要食太多，而且食得清淡，感覺都舒服啲，於是佢就愈嚟愈愛上食素。如果冇飯局，佢就食得更加簡單，例如午餐佢經常去泳池游番幾個圈先，跟住飲兩杯果汁就搞掂晒。
功德林係「零食天王」戴德豐旗下嘅四洲集團所屬食肆，喺本港素食市場穩佔領導地位，好多城中名人都係捧場客。好似牛仔褲大王楊釗，就最鍾意喺自己物業北京道一號嘅功德林宴客啦！
