名人後代近排陸續返香港抖暑，廠商會副會長施榮懷大仔施湧樂都唔例外；上星期四，爸爸有馬出，一於跟埋入場做啦啦隊。喺美國讀緊預科嘅湧樂似足爸爸，生得高頭大馬，加埋一副烏蠅黑超及一張瓜子臉，甚有韓國型男Feel。呢排全城熱話世界盃，湧樂都唔執輸，約埋爸爸睇波。佢熱捧阿根廷，施生就力撐巴西隊，各有所好，雖然最後兩隊都出晒局，但佢哋賽後齊齊交流睇波嘅心得，friend到似兩兄弟多啲喎！
（葉華英攝）
