中環出更：好友為劉夢熊抱不平
煲呔曾經常「大細超」，頒授勳章親疏有別已經唔係咩新聞，不過諗唔到今年佢連獲授勳人士都辣興埋。啱啱攞咗銅紫荊星章嘅全國政協委員劉夢熊就同卓妮呻，話身邊老友戥佢唔抵，認為佢一直為政府政策護航有功，冇理由只得個銅章喎。
尋日下晝四點幾，劉生現身中環置地嘅Cafe Landmark歎茶，同行仲有兩位男性友人，三人邊傾偈邊細閱文件，唔知係咪喺度傾緊生意。坐咗半粒鐘，劉生呢個大忙人就起身走先，卓妮上前恭喜佢獲授勳，點知佢木無表情咁話：「我個人無乜感想，不予置評，不過身邊啲老友就為我抱不平！」
何解呢？劉生忍唔住呻話，得獎消息公布後，收到數十個朋友來電，不約而同話勳章級數低咗啲。梗係喇，老友們睇住佢喺政改期間經常單拖出席《城市論壇》，舌戰台下反對派，表現神勇，又經常喺報章登廣告撐政府施政，出咗咁多力，最後只得一個銅章，老友梗係睇唔過眼喇！
但劉夢熊好豁達咁話：「我做事全部都發自內心，有冇勳章都冇所謂。既然政府畀嘅，我都會樂意要嘅！」