中環出更：彤叔慷慨9000萬捐科大
周大福集團董事長、新世界發展主席鄭裕彤以「周大福鄭裕彤基金」名義，首次捐九千萬元畀香港科技大學，尋日隆而重之喺科大舉行捐贈儀式，彤叔同兩位第三代接班人、孫仔鄭志剛（Adrian）及鄭志恒（Conroy）齊齊現身，場面好熱鬧。科大校長陳繁昌（Tony）自爆上任後三訪彤叔，第三次會面時同彤叔開口募捐，就得到佢嘅積極回應。佢勁讚彤叔為教育下一代不遺餘力，將來必有豐盛回報。
波鞋襯西裝夠親民
Tony係國際知名數學專家，離港讀書同工作咗幾十年，但仲保留咗中國人尊師重道嘅美德。尋日卓妮問佢揼彤叔心口嘅過程，佢笑謂去年九月返港接任科大校長後，即刻登門拜訪彤叔，當時大家幾好傾。今年過年佢又去同彤叔拜年，後來第三次再見彤叔時，先至提大學要興建一幢全新科研與教學大樓，但仍缺少資金，經過詳細解釋之後，彤叔就好疏爽咁應承捐贈九千萬元，終於令呢座需資五億元嘅大樓資金全部到位。
人說為善最樂，尋日雖酷暑難擋，但彤叔做起善事就渾身是勁，仲好罕見同兩名乖孫蒲頭。彤叔近年嘅波鞋Look深入民心，尋日卓妮見佢着住對七百蚊有找嘅黑色Nike Free經典跑步鞋襯西裝，形象好親民。彤叔話貪佢夠舒服，屋企有兩、三對波鞋替換，唔算多啦！
一直喺外面闖天下嘅彤叔次子鄭家成嘅囝囝Conroy，去年被安排返家族企業周大福集團任職後，行事風格好低調，但尋日面對傳媒時好拘謹，可能遲啲就慣啦！講番科大呢幢即將興建嘅科研與教學大樓，樓高八層，面積達一萬平方米，大樓將設有開放式實驗室同埋先進教學設施，仲有一個四百座位嘅多用途講堂，彤叔慷慨解囊，新大樓將以彤叔命名。
卓妮