政情：鐵頭仁焗爆料救黨

我哋早喺個多月前已率先披露，代表中央與民主黨溝通嘅中間人，就係基本法委員會副主任梁愛詩。民主黨為紓緩因支持政改而承受嘅政治壓力，尋日表明會發表報告公開同中央談判嘅詳細內情，以示自己冇同中央做過枱底交易，出賣香港。民主黨主席何俊仁尋日更首次公開證實，呢位獲中央最高層授權同佢哋談判嘅中間人就係詩姐，再一次印證我哋嘅報道！