政情：葉劉借扮嘢文捧徒弟
匯賢智庫主席葉劉淑儀個大弟子陳岳鵬早排辭去區議員職務，去咗特首辦做特別助理，泛民各黨派對呢個區議會空缺虎視眈眈，公民黨同社民連嘅「維園阿哥」任亮憲講明會出選。葉劉尋日就帶埋新弟子劉應東出嚟同海洋公園主席盛智文開會，爭取將原來構思嘅鋼綫灣港鐵南港島線工程卸泥區，搬埋去海洋公園擴展工程嘅卸泥區度。
葉劉會後話，盛智文對建議持開放態度，仲話會積極考慮添，佢哋又約咗港鐵行政總裁周松崗開會傾呢件事，到時徒弟劉應東都會出席喎。早前葉劉講咗準備搵劉應東選番陳岳鵬個位，依家不斷幫徒弟鋪橋搭路見商界巨頭，變相幫佢助選。
講開又講，早兩日全國人大常委范徐麗泰同被視為下屆特首熱門候選人嘅行會召集人梁振英突然隔空開火，有傳葉劉都係下屆特首選舉嘅黑馬，唔知佢又點睇呢件事呢？葉劉一聽到就話太敏感唔會評論。咁佢下屆會唔會參選特首呢？葉劉同樣話唔會回應。咁嘅反應，莫非想留番條後路畀自己？