政情：范太唔知囝囝攬o靚模
一大班朋友出海boat trip絕對係夏天最佳活動，上個月廿三日雖然陰晴不定，不過全國人大常委范徐麗泰囝囝范駿華（Andrew）、遠東集團邱德根細仔邱達根、Neway太子爺薛嘉麟等一班好友，唔知係咪貪閒日少人出海玩，所以揀呢日遊船河，同行仲有唔少年輕o靚模。平時樂於助人嘅Andrew，玩嗰陣一樣咁熱心，充當司機，載住o靚模喺海上片，認真有風度。
不過當日正值立法會開始辯論政改，好多愛國青年團體都拉隊去立法會大樓外支持，但係佢哋三個就揀咗喺呢日出海，唔知係咪有預感政改一定會通過，所以唔使去幫手打氣呢？
身為馬會大董嘅范太，前日現身馬場，對於囝囝被雜誌圖文並茂刊登開船Ｐ及攬o靚模過程，范太笑笑口坦然話，佢無睇過本雜誌，唔知係咩嚟嘅，所以都唔知發生咩事，要等佢了解完之後先同我哋講喎。唔知范太睇咗之後，會唔會扭Andrew耳仔呢？