政情：陳新滋拍短片谷人氣
今時今日要做大學校長真係唔容易，個個都要搞搞新意思親民一番，仲要想盡辦法幫大學籌款。好似尋日第一日正式返工嘅浸會大學新校長陳新滋，為拉近與師生嘅距離，唔單止拍咗條短片放上YouTube介紹自己，仲搞搞新意思，同師生玩對聯遊戲。
為歡迎呢位新校長，浸大二百幾名師生尋日中午搞咗個歡迎會，會上播出陳校長放咗上YouTube嘅自我介紹錄影帶，片長分幾鐘，內容無咩特別，主要係同老師學生打招呼，最有心思係短片有廣東話、英文同普通話幾個版本，兩文三語齊晒，等來自各方嘅學生都聽得明。播完短片之後，陳校長仲自嘲短片中嘅佢好緊張，個樣呆呆滯滯，完全無架子！
陳校長又同師生玩對聯遊戲，佢先講橫批同上聯，前者係：「篤信力行」，後者係：「立德言功以仁愛開百代」，仲度埋下聯，就係：「求真善美持正心立千秋」，但為與眾同樂，佢邀請師生集思廣益對埋下聯，對得好，仲可以同佢共進晚餐添。