政情：彤叔九千萬贈科大
正所謂「十年樹木，百年樹人」，要培育人才，教育經費不可少。唔少大學嘅經費都係來自各方有心人捐獻，今次呢個有心人就由周大福集團主席鄭裕彤來充任，佢將會以「周大福鄭裕彤基金」名義，捐九千萬畀香港科技大學，支持科大興建科研教學大樓，呢幢新大樓將會設有跨學科實驗室同其他教學設施，肯定會為學生提供一個更佳學習同研究環境。
依家幢大樓仲未改名，唔知彤叔到時會唔會以自己個名嚟冠名，不過有一樣可以肯定嘅，就係喺星期一嘅捐贈儀式上，兩個第三代接班人、乖孫鄭志剛（Adrian）同鄭志恒都會出席撐彤叔。
其實彤叔支持大學，鄭志剛亦對大學生相當支持，本身係周大福董事嘅Adrian身兼新世界發展、新世界中國及新世界百貨嘅執董，呢兩年佢都喺旗下撥出唔少職位出嚟畀大學生返內地實習，都算唔話得囉。