中環出更：金勞詹世盃好「和」味
今屆南非世界盃賽事踢咗五十幾場，四分一賽果都係打和收場，唔少人都輸到一仆一碌。不過，自誇「賭仙」嘅立法會議員詹培忠（金勞詹）就睇通睇透，自創一套「和波必勝術」，場場都買和波，結果贏到開巷，五十幾場波總共贏咗四百零八注，每注買一萬元都已淨袋四百零八萬元；如果每注買大啲，真係唔講得笑。
卓妮尋日喺立法會門外遇到金勞詹，問佢有冇投注玩吓世界盃，佢隨即喺西裝褸袋取出幾張A4波纜紙出嚟，啲紙寫滿晒每場賽事資料及賽果，最後一欄寫上「+408」，即係贏四百零八注。金勞詹話，佢場場買和波，如果輸咗，下一場就買雙倍；再輸，就再買雙倍，應該等到和波機會。萬一等唔到又點呢？就會輸得好慘烈，學唔學金勞詹，真係你諗你喇！
林健鋒當正巴西無敵
睇番金勞詹張波纜，有幾場和波賽事令佢起死回生，包括意大利對巴拉圭、斯洛文尼亞對美國、尼日利亞對南韓、巴拉圭對新西蘭、巴拉圭對日本，呢幾場賽事贏得嘅注數抵銷咗四十多場非和波賽事。金勞詹估計，餘下幾場賽事仲有和波機會，即係仲有機會進帳。金勞詹同好多球迷一樣捧巴西隊，其次就係阿根廷，但佢話南非治安唔係咁好，唔敢去現場睇冠軍賽喎！
同樣捧巴西嘅經濟動力林健鋒（Jeffrey），尋晚本來打算約埋黨友梁君彥等好友到尖沙咀一間餐廳欣賞巴西對荷蘭賽事，但最後都係決定返屋企。Jeffrey仲計劃七月中同家人到巴西旅遊，去里約熱內盧食巴西串燒，順便慶祝巴西贏世界盃喎，講到好似贏梗咁！