中環出更：趙樓神遊加州小鎮 一見鍾情
暑假快到，政商界名人紛紛計劃外遊，相信大家行李都未執，但長實執行董事「趙樓神」趙國雄（Justin）已經遊完美國加州返港。卓妮尋日喺香港會遇到Justin，佢話早前有朋友請佢到加州Sausalito度假，其實之前自己已去過一次，被當地優美風景吸引住，所以長實位於馬鞍山樓盤「嵐岸」嘅英文名，就選用Sausalito呢個名。
Sausalito係三藩市對岸一個小鎮，由著名嘅金門大橋連接，當年黎明同張曼玉主演嘅電影《一見鍾情》都係喺Sausalito一帶取景，充滿歐洲風情，難怪Justin都被深深吸引。Justin話，遊完加州後，原本有朋友邀請佢到南非欣賞世界盃冠軍戰，希望為愛隊巴西打打氣，但礙於公司工作太忙去唔到，相信呢個亦係佢提早放暑假嘅原因。
陳家強東歐充電
Justin離開後，轉頭又見到財經事務及庫務局局長陳家強喺香港會出嚟，卓妮知道佢日日袋住部小型電子計步器，目標係每日行萬步，尋日果然見佢由香港會一路行返去位於政府總部西翼嘅辦公室，不過天氣酷熱，忍唔住除咗件西裝。
講開暑假，原來佢都打算放自己一個星期大假，同太太到東歐旅遊充電，行程由太太話事。近期世界盃賽事搞到一眾球迷捱夜睇波，陳家強就無影響，事關佢唔好足球，只鍾情棒球同高爾夫球。佢話老虎活士打唔出水準只係輸心理，相信以活士嘅超高技術同魄力，一段時間後就會回復水準。
卓妮