政情：授勳唯親 煲呔曾犯眾憎

煲呔針顧名思義係煲呔曾支「針」，長期幫港府收風索料，煲呔曾要論功行賞，派個金紫荊星章畀佢，大家心照不宣。不過，政府咁樣讚煲呔針：「創辦長者安居服務協會，為獨居長者提供平安鐘服務，建樹良多。」就睇得人好刺眼，平安鐘雖則係社企，老人家都有畀錢嘅喎；如果煲呔針肯唔收錢幫公公婆婆，大家或者會服啲。

協會針爆料力數不公

尋日有一位自稱「協會針」嘅長者安居服務協會職員爆料，指煲呔針間公司就係平安鐘嘅供應商，靠平安鐘賺到盆滿缽滿，而且煲呔針喺協會十四年，出席會議唔超過二十次，點講得上為獨居長者勞心勞力呀？更何況，創辦人仲有羅致光、聶揚聲、羅就及黃岳永等人，何止煲呔針一個人。到底「協會針」啲料有冇煲呔針嗰啲咁準咁勁，煲呔針都應該出嚟澄清吓囉。

煲呔曾分餅仔親疏有別，唔止市民睇唔過眼，政黨一樣怨氣沖天。有自由黨中人指，今年該黨得一個常委李應生攞銅紫荊星章；相反，被自由黨視為「叛將」嘅全國政協委員李大壯就獲銀紫荊星章，脫離自由黨另起爐灶成立經濟動力嘅「3L」之一梁君彥更獲頒金紫荊，煲呔曾係咪恃勢凌人，想剃自由黨眼眉先？

連公務員都對今年授勳有微言。前食物及衞生局常秘孔郭惠清、前發展局常秘麥齊光、前運輸及房屋局常秘陳鎮源退休前平起平坐，但麥同陳獲頒金紫荊，孔太就得銀紫荊。論資歷，孔太可能未及陳鎮源，但論政績，陳鎮源喺梁展文加入商界單嘢就揹咗鑊，明知梁展文曾參與紅灣半島補地價事宜，都建議公務員事務局批准梁嘅新職，所以事後備受批評，孔太依家喺特區星章排位竟然屈居陳鎮源之下，睇出煲呔曾呢份封賞名單幾咁亂嚟，怪不得咁多人不平則鳴！