政情：華叔妙語反駁示威者

身患末期肺癌嘅民主黨元老司徒華，繼早前被多年戰友社民連梁國雄辱罵「癌上腦」後，尋日出席七一遊行時，再被大批反對民主黨支持政改方案嘅示威者羞辱，包括指摘佢出賣港人。開始時講過會以微笑對抗辱罵嘅華叔，最後亦忍唔住作出反擊，反問民主黨點樣出賣港人，「賣咗幾多錢呀？你係豬係狗呀？可以賣㗎？」一開口，不知幾辛辣。