政情：高太寸政府授勳太遲
○九年諾貝爾物理學獎得主，有「光纖之父」美譽嘅前中文大學校長高錕獲特區政府頒發最高榮譽嘅大紫荊勳章。高錕太太黃美芸尋日喺三藩市寓所接受本報電話訪問，佢話上星期已經收到特區政府嘅電郵通知，兩夫婦感到相當榮幸同高興，亦希望可以藉此啟發港人為香港貢獻所長。
自從高錕得到諾貝爾獎之後，各界都以唔同方式去向佢致敬，唔知今次呢個大紫荊勳章對佢嚟講又有冇特別意義？高太諗一諗之後話：「光纖技術已經在四十多年前發明，近二十年才被廣泛應用。」咁即係覺得嚟得太遲？「他已經年老了！」咁係唔係應該早幾年頒呀？高太只係重複：「他已經年老！」其實高太喺丈夫拎諾貝爾獎時都話過個獎太遲，高錕喺香港工作多年，政府就一直唔識寶，高太有微言都唔出奇。
高太提到，由於冇請工人，日常生活好繁忙，所以唔會特別慶祝；兩夫婦反而打算九月返香港，相信會出席十月嘅授勳典禮。另外，高太話丈夫身體唔錯，依家正接受針灸治療，但暫時未知效果。