政情：何鴻燊獲大紫荊感鼓舞
何鴻燊啱啱獲特區政府頒發大紫荊勳章，佢更加係首個同時得到香港、澳門兩地政府頒發最高榮譽勳章嘅知名人士。燊哥尋日透過旗下公司嘅公關部門發表咗一篇受勳感想，話自己知道會獲頒大紫荊之後感到榮幸同興奮。
四太送「肉嘴」做賀禮
燊哥話，自己好幸運有機會喺過去幾十年參與香港嘅建設過程，佢身為企業家，認為必須關心社會，同時履行社會責任，因為呢啲對佢嚟講都係快樂嘅泉源。佢仲提到，自己一直心繫教育事業，因為「財富聚散無常、惟學問終生受用」，所以一直致力培育人才，回應社會需要。燊哥又提到，呢次嘉許係莫大嘅鼓舞，佢對香港未來充滿信心，會繼續同廣大市民喺愛國基礎上繼續同心協力，一齊建設繁榮進步、和諧穩定嘅社會。
除咗燊哥自己之外，四太梁安琪對於老公獲頒大紫荊勳章都覺得好開心，佢話燊哥咁多年來都積極行善，參與多項慈善工作，可以話係受之無愧。四太仲話，一定會同老公開慶祝派對，到時仲會送「肉嘴」同熊抱做禮物添。