政情：金勞詹係「有牌」中間人

金勞詹平時同泛民喺議事堂成日駁火，又為功能組別護航，估唔到喺政改一役有份出力幫民主黨嘅，亦係呢位「金牌莊家」，真係估佢唔到。

據悉，早喺五月二十八日，中央接觸金勞詹，指明唔接受民主黨區議會方案，但要建制派三十六票歸隊，為二○一二年政改方案投支持票，以示團結，金勞詹當場拒絕，仲反過嚟幫民主黨講好話，游說中央接受方案，從此就扮演起「中間人」角色，全力「起錨」四圍向建制派人士硬銷民主黨區議會方案。

陳利害 主採納方案

六月三日中午，金勞詹向范太推介區議會方案，夜晚上禮賓府同煲呔曾食飯，佢教煲呔曾上書中央爭到底。六月十六日，中央仲為係咪讓步十五十六，又派人問金勞詹意見，當時金勞詹力主採納方案，力陳利害，指若方案再難產，港府會好難管治、激進民主派會對特區管治造成「文革式」破壞，以及會為建制派明年區議會選舉同後年立法會選舉帶嚟反效果。翌日，詩姐改口風，指方案可考慮，成為事件轉折嘅風向標，到底係巧合，定係有因果關係？

表決前夕，金勞詹嘅中間人角色介入更深。十九日，李剛約金勞詹食飯，席間仲有中聯辦研究部部長曹二寶，李剛叫金勞詹代為向民主黨探問，若中央接納方案，民主黨係咪一定撐政改，張文光回覆金勞詹：「ＯＫ！」翌日李剛見民主黨，正式澄清中央認為方案無違反《基本法》，為方案開咗綠燈。

我哋問有份喺二十日見李剛嘅張文光，證實前一晚金勞詹的確搵過佢。民建聯劉江華亦話，金勞詹曾成功游說佢接受區議會方案，睇嚟金勞詹的確出行力谷政改「起錨」，可惜，「政改起錨」電視宣傳短片無佢份拍吖，如果唔係，可能都攞番個大紫荊勳章。