中環耳目：肥仔張陳嘉容品嘗鵝肝紅酒
立法會飲食界代表張宇人向來識飲識食，美酒與佳餚配搭絕對難唔倒佢，早前佢出席一個葡萄酒收藏商搞嘅晚宴時，遇到一位靚女知音人，就係模特兒陳嘉容。
自爆做廚多年
兩人席間分享飲食心得，並大讚煎法國鵝肝配車厘子及開心果醬汁，配上1996年Chateau Leoville Las Cases紅酒，兩者配搭得相當好。
肥仔張自爆以前喺西餐廳做過多年廚師，所以煎鵝肝亦覺無難度，但對於當晚嘅鵝肝亦讚不絕口。陳嘉容話，鵝肝微微煎香後，外脆內軟，口感柔潤，入口即溶，配以車厘子及開心果醬汁，酸酸甜甜，相當好味，而Chateau Leoville Las Cases紅酒亦帶有果香，圓潤豐滿，口感好幼滑，與鵝肝相當匹配。原來陳嘉容現正修讀紅酒二級課程，唔怪得佢嘅酒評咁好啦！