中環出更：肥胡睇馬望遠鏡值逾萬元
本身係醫管局主席又係全國政協嘅胡定旭，啱啱又上任做埋香港總商會主席。公職多籮籮嘅佢，理應忙到飛起至係，不過日前我哋就喺馬場撞到佢自備私伙望遠鏡，抽空為愛駒打氣。唔好睇小佢手上呢副小小嘅望遠鏡喎，事關佢一啲都唔簡單，要成萬銀㗎！
唔少政商界名人都係愛馬之人，肥胡都唔例外，睇佢咁捨得一擲過萬買望遠鏡睇馬就知。佢副望遠鏡係出自德國品牌蔡司（Zeiss）手筆，呢個牌子係過百年老牌，除咗生產望遠鏡，佢哋製造嘅相機鏡頭更加係享譽全球。
肥胡就大讚呢個品牌出嘅望遠鏡乜尺碼都有，梗有一款啱手形，而佢就特別鍾情佢手上呢副，貪佢重量大小啱啱好，唔算太重。佢仲自爆呢副望遠鏡已經買咗好多年，用嚟睇愛駒晨操一流，仲話用佢見證過唔少愛駒贏頭馬添！
卓妮