中環出更：邊行邊歎凍乳酪郭位消消暑
炎炎夏日降臨，熱到連卓妮都要走入中環ifc涼吓冷氣消暑。前日行經「yo MAMA」冷凍乳酪專門店，遇到剛獲委任為太平紳士嘅城市大學校長郭位買乳酪。郭位喺乳酪凍櫃前指手畫腳，柯打咗一杯普通裝綠茶乳酪加杧果，盛惠二十八元，之後好似小朋友咁邊行邊食，唔講好難估到佢係大學校長。
原來當日郭校長約咗兩個朋友到ifc午膳，食飽飯就去買杯乳酪當做甜品。卓妮上前同佢打招呼，佢好愕然話自己唔係乜嘢知名人士，只係一個普通嘅大學校長，又話平時好少出嚟中環，通常只會喺城大鄰近嘅又一城活動，原本仲諗住中環食嘢會好貴，但發現廿幾蚊杯乳酪又唔算好貴喎！
活動範圍小 唔使用手機
郭校長又話，其實佢做校長嘅生活好簡單、好普通，唔似其他校長咁多公職，仲自爆話，曾經有人請佢做顧問，酬金竟然係天文數字，但佢不為所動，覺得既然接受咗做校長，就唔應該再接受其他邀請，希望將時間接觸多啲學生，了解學生嘅需要。
同郭校長傾咗一陣後，佢就話夠鐘趕去同司機會合，否則過咗約定時間個司機就好難搵到佢。原來郭位向來唔用手提電話，就算大學秘書主動提供手機畀佢都無要，因為佢嘅活動範圍來來去去都係幾個地方，要搵佢實搵到，佢又少用電郵，就算唔用手機都無損失。
「yo MAMA」冷凍乳酪來自意大利，以高鈣低脂奶混合乳酪製成，每杯只有極小量脂肪，啱晒愛甜又怕肥嘅人士。該店提供原味乳酪及綠茶乳酪兩款口味，仲有鮮果及二十多款乾濕配料選擇。郭校長選擇嘅綠茶口味就內有淡淡綠茶香，配襯鮮果仲好味，所以佢加杧果認真識食。
卓妮