政情：張炳拒認呼籲撐政改
政改方案卒之通過，餘下嘅只係本地立法問題，特區政府可以鬆一口氣；不過，撐過政改、戴過「起錨」襟章嘅人，仍然成為箭靶。身兼行會成員嘅教育學院校長張炳良，尋日返教院出席政改研討會，已經冇再戴住「起錨」襟章；雖然出席嘅人寥寥可數，但席間有教師質問張炳作為一個學者，佢同另一名行會成員梁智鴻幫政府拍宣傳片，究竟同學者身份會唔會有矛盾呢？呢位教師仲講明，張炳嘅答案將會成為佢嘅教學內容。
張炳即時笑笑口解釋，佢唔認為學者唔可以表態，加上宣傳片中即使有「起錨」標誌，但佢無呼籲市民支持政府政改方案，只係呼籲啲人要尋求突破，仲話條片嘅內容由佢寫，所以佢記得十分清楚喎。依家連票都投埋，張炳梗係講得輕鬆啦；若然立法會尚未表決政改，佢又會唔會咁答呢？