政情：陳茂波揀大學有一套
暑假就嚟到，一班廿四孝家長已經開始諗定同仔女去邊度旅行，立法會會計界代表陳茂波（Paul）都打算八月同屋企人去美國，順便幫啱啱讀完中五嘅細女搵大學。
講開搵大學，阿Paul話讀大學唔一定要揀大規模嘅名校，要睇仔女本身想點規劃自己嘅前程，如果一早已經諗住讀完大學要繼續升學的話，讀規模較細嘅大學反而比較有幫助。何解呢？阿Paul就話，要讀碩士甚至博士課程，除咗自己成績要好，另外教授嘅推薦信一樣咁重要。規模細啲嘅大學，教授可以有多啲時間同學生傾偈，討論論文觀點，變相令教授可以對學生有深入認識，第日寫嘅推薦信內容都會豐富好多！
不過阿Paul認為，最重要都係仔女自己到底適唔適合嗰間學校，所以佢覺得大家可以學吓佢咁，暑假送仔女去外國大學讀暑期課程，畀佢哋有機會真正認識大學文化。