政情：梁愛詩為善不欲人知
全國人大常委會基本法委員會副主任梁愛詩近排人氣好高，事關佢居中斡旋促成中央接受民主黨區議會方案，令政改方案終於有驚無險咁過關，但詩姐唔邀功，謙虛態度值得一讚。尋日佢現身樂施會名牌義賣活動，繼續貫徹謙虛本色，話自己冇咩名牌可以捐贈，就算有都被佢用到殘晒啦！
以詩姐今時今日嘅實力，冇咩名牌買唔起，只不過佢嘅興致喺名貴銀器多過奢侈品啫！我哋就曾經兩次見佢喺中環銀飾名店選購吊墜同埋耳環。詩姐話晒係樂施會董事局成員，既然做唔成捐贈者，咁又會唔會買番兩件支持吓呢？佢笑謂尋日人多，所以唔會買住，費事畀大家見到晒！詩姐果然係為善不欲人知！
樂施會舉行名牌義賣活動已十幾年。據中環樂施商店負責人Ann話畀我哋聽，好多城中名人都好支持佢哋，經常匿名捐贈名牌衫、袋同埋鞋，甚至日用品都有。佢哋會按捐贈者買入時嘅原價，打個五折作為售價，所以有心人士可以落店舖試吓自己手氣，話唔定執到平、靚、正嘅八成新貨㗎！