政情：任總坦蕩蕩就地「證髮」

尋日任總出席一個慈善機構周年大會，聽見有記者咁質疑佢，即時話可以畀記者驗下，兼且烏低身遷就個記者話：「你掹吓、你掹吓！」認真係君子坦蕩蕩，佢仲「一臉誠懇」話，依家都開始有甩幾條頭髮添。不過講唔夠兩句，轉頭又話唔知點解出番啲黑頭髮，搞到個頭黑咗好多。任總嘅寸爆本色，真係難移囉！

不過家吓美容補身呢啲嘢唔再係女士專利，問任總有冇打羊胎素？任總笑一笑，跟住話自己無咩點保養。

做非執董服務國家

講開寸，啱啱同太太喺日本北海道叉完電返嚟嘅佢，賞櫻花之餘，仲喺戶外燒鮑魚添！早幾日建行董事長郭樹清踢爆任總依家喺建行做非執董，冇得支薪，最多只係拎袍金，得十零萬「有限錢」。

嘩！咁又點夠任總燒鮑魚呀？任總笑笑口話，喺函館燒隻鮑魚，只需一千Yen就有交易，抵玩夾抵食。佢仲好認真咁話，今次做非執董唔係為錢，而係想為國家服務。咁又係，任總唔願又有邊個請得你郁？