政情：煲呔曾又玩親疏有別

截至尋日，工聯會、專業會議、「五散人」同匯賢智庫葉劉淑儀一大班建制派人士，都異口同聲話佢哋無收到煲呔曾嘅邀請，聽聞當中有唔少人都頂住條氣，不滿煲呔曾又玩「親疏有別」。

KK自嘲批政府遭「報復」

眾所周知，政改方案成敗直接左右煲呔曾仕途，若然唔通過或低票勉強通過，煲呔曾能否完成餘下兩年任期都成疑問，今次建制派三十六票一致撐港府，雖則話係跟中央柯打做事，但點都叫幫咗特區政府一個大忙，煲呔曾向各人講聲「多謝」都好應該。所以，粉嶺別墅設宴，請大家食番餐，只係基本工夫，可惜，煲呔曾都做得毫無誠意，令建制派對佢更為不滿。

據了解，煲呔曾已經正式邀請民建聯七月十一日去粉嶺別墅食飯，但我哋向其他建制派政黨打探，工聯會黃國健（KK）、專業會議梁美芬、「五散人」陳茂波同葉劉淑儀都話，未收過煲呔曾嘅邀請喎，唔通喺煲呔曾眼中，只有民建聯同民主黨嘅票先至值錢？就算唔係親疏有別而係前後有別，都夠晒乞人憎啦。

KK就講笑自嘲，話唔知係咪立法會辯論方案時，工聯會批評得政府太勁，所以慶功宴無份呢？如果係真嘅，煲呔曾就唔單止大細超，仲係衰小器添！難怪唔少建制派中人都為此頂住條氣。

一名不願具名嘅建制派人士透露，之前煲呔曾出席建制派飯局時，承諾政改方案通過就會請食飯，直到上星期五嘅建制派飯局，席間有人提議係時候提醒煲呔曾兌現承諾，好多人即時起哄，大叫唔好，話要睇吓煲呔曾會唔會過咗海就係神仙，有人更加表明，就算收到邀請都唔會去，建制派對煲呔曾嘅不滿有幾深，可想而知。

仲有，五散人應煲呔曾要求，喺政改方案表決前嘅星期日到禮賓府見煲呔曾，五散人之中有一人遲到，煲呔曾遲遲唔肯現身迎客，到現身一坐低就話入正題，口脗好似老闆見下屬一樣，當遲到嘅嗰位五散人嚟到，煲呔曾更加黑面，求人都求得咁無誠意，更何況係請人食飯呢！