中環耳目：怪醫切完內臟食牛雜醫肚
醫生食嘢有特別嗜好同避忌，反而未必會為咗健康而對食物精挑細選。例如本身係外科醫生嘅立法會代表怪醫梁家騮，食嘢最緊要快，仲習慣喺做完手術之後歎番碗牛雜。啱啱搞完病人內臟就食牛雜，唔覺得肉酸咩？怪醫立即糾正話：「唔同㗎！有生命嘅內臟好靚㗎，靚到好似BB咁！」普通人真係難明。
金刀梁見乜食乜
家庭醫學科嘅李國棟醫生就謝絕娃娃魚同埋生蠔，試過有次喺澳門食咗娃娃魚，導致佢敏感抖唔到氣，搞到要送院急救打針。至於生蠔就會令佢肚屙，屢試不爽。佢推崇「可持續性嘅飲食習慣」，即係話維持均衡飲食。
泌尿科名醫、「金刀梁」梁智鴻就話食乜都冇所謂。金刀梁平時好忙，佢話見到咩都食，唔會揀擇，但唔會食太多。
前日喺馬會，見到骨科名醫高永文好講究咁買咗杯橙汁溝法國礦泉水Perrier，原來佢鍾意飲有氣、冇酒精嘅果汁味飲品，照計香檳至啱佢，但高醫生嫌酒精濃度高，所以咪自製心水飲料囉。高永文仲話佢有三樣嘢唔會食，包括妨礙鈣質吸收嘅咖啡、痛風症殺手豆漿，同埋膽固醇高嘅貝殼類海產。