中環出更：開心果肥亨任影唔嬲

中策集團主席馬時亨向來係開心果，當年做局長練得一身好武功，面對大班記者圍攻，依然笑住解圍。呢種本領，至今未退步。上個星期四晏晝兩點幾，肥亨行經中環置地廣場，邊行邊傾電話，但當發現有記者影相，佢反應不知幾快，望住鏡頭哈哈大笑。卓妮諗，佢嘅反應，簡直係名人喺街上畀記者影相嘅榜樣。肥亨上月創出人生首個高球一桿入洞，咁lucky，肥亨話，已訂定枱，下月請老友擦餐勁。