中環出更：留港消費田少掃靚鞋
名店紛紛減價，又係掃貨好時機！旅遊發展局主席田北俊早前都趁Giorgio Armani做緊七折大減價，掃咗對小牛皮皮鞋，慳番千幾元。近排歐元大跌，去歐洲Shopping更抵，但田少話，眼見香港零售市道麻麻，寧願留港消費，振興經濟。
簡約高雅嘅Giorgio Armani，係專業才俊必然之選。中環人流傳一個講法，就係上班族衣櫃內，至少有一套Giorgio Armani。其出品嘅皮鞋，柔軟舒適，着上腳，幾乎忘記自己着咗鞋。田少慧眼識Giorgio Armani，早已係熟客。
世盃熱捧巴西阿根廷
早前一個星期一下晝，田少又出動！嗰日四點幾左右，卓妮見佢抽住一袋Giorgio Armani，沿住中環遮打道行返去位於和記大廈嘅公司，原來啱啱喺遮打道嘅Giorgio Armani專門店掃到筍嘢。
係乜呢？就係一對黑色Loafer鞋，原價四千幾元，七折後只需三千幾元。Loafer鞋予人休閒感覺，但Giorgio Armani稍變魔法，用上矜貴小牛皮，即時換上貴族格調。田少話，黑鞋易襯衫，絕對無買錯。
執到好嘢，田少笑呵呵。不過名店喺六月就急不及待減價，證明零售市道氣氛麻麻哋。田少話，本來諗住趁歐元回落，七月去歐洲旅行先大舉橫掃名店，但諗深一層，自己係香港人，無理由唔幫香港。行Giorgio Armani使吓錢，自己happy，店員又開心。
呢排全城熱捧世界盃，田少都睇埋一份，支持巴西同阿根廷。講到睇波好去處，佢話寧願匿埋屋企睇，好過「夜麻麻」貢出街喎。
卓妮