中環出更：李鋈麟古董拐杖榮休

身兼東華三院總理嘅北京市政協委員李鋈麟（Alan），年初臨上北京開政協會議前，踢波唔小心搞到右膝頭斷咗十字韌帶。Alan做人唔易低頭，所以一直都唔肯畀自己休息，仲差唔多個個月都要東奔西跑四圍飛。鐵人捱得住，不過呢幾個月日日同佢形影不離嘅古董拐杖早半個月終於光榮退休。

Alan好多年前去法國南部旅行，貪得意買咗支古董拐杖返嚟，一心諗住當裝飾品用，勢估唔到會因為膝頭受傷而用得着。Alan每日只係休息六個鐘，前排又飛咗去歐洲兩個星期，游走英法兩國傾生意，加上佢身形有番咁上下，終於喺返嚟香港無幾日，支拐杖就「啪」一聲斷咗。

好彩Alan個朋友啱啱喺日本公幹，拿拿臨幫佢買過支新「幫腳」返嚟。不過，Alan隻腳好得七七八八，應該好快唔使再用拐杖，我哋都喺度祝Alan快啲好番，唔使再買第三支拐杖啦。