政情:張宇人飲酒計住Quota

呢幾日立法會挑燈夜戰,好多立法會議員同高官嘅社交活動都停晒。前晚韓國一間葡萄酒收藏商喺中環一間酒店舉行香港開業酒會,飲食界議員張宇人(Tommy)梗要畀面出席,見佢晚上八點幾喺立法會溜咗出來,佢笑謂已帶備手機、Call機,隨時準備返去投票。

Tommy呻話,佢原本訂咗周三機票去法國,帶埋去年香港「美食之最大賞」得獎廚師去參加波爾多葡萄酒節,教當地酒莊如何用唔同靚酒配搭美食,然後再去巴黎、倫敦,行程不知幾寫意。點知突然間立法會又要展開車輪式辯論,佢惟有留喺香港。不過Tommy爆肚,話一向好識歎紅酒嘅政務司司長唐英年安慰佢,話個葡萄酒節麻麻地喎!

講開歎紅酒,Tommy話自從減肥成功後,飲酒都好揀擇,冇專家畀九十分以上嘅酒都咪預佢,費事嘥晒佢食嘢嘅Quota。佢好精明咁計條數畀我哋聽,話半支紅酒高達七百五十卡路里,試過有次佢夜晚飲咗好多酒,第朝上磅竟然重咗兩磅,所以大家千祈咪睇小紅酒嘅熱量喎。