政情：大舊石生日 焗撇低女友
前日係專業會議立法會議員石禮謙嘅六十五歲生日，一般人生日梗會約埋三五知己、親朋摯愛去慶祝一番，但因政改方案辯論由星期三起搞足三日，結果令到大舊石連生日正日都要被迫留喺立法會過。生日都唔可以同女朋友過，唔知大舊石怕唔怕畀女友「詐型」呢？
前晚開完會後，問大舊石遲啲會唔會約番女朋友Lisa補祝生日，大舊石死都唔肯講，神神秘秘話依家仲未知，要等表決埋政改方案先慢慢諗。佢仲猛咁呻，話因為生日要困喺立法會開會，結果搞到禮物都收唔到一份。不過睇真啲，佢好似戴咗副新眼鏡喎，唔通係買畀自己嘅生日禮物？
大舊石笑住話完全唔關事，副眼鏡的確未用過，但其實已經買落一排，同生日無關。既然收唔到禮物，佢又會唔會買份大禮獎勵自己咁呢？大舊石就話，自己身形肥胖，日日都好似生日咁，所以都唔需要特別買嘢。雖然我哋唔係好明身形健碩同生日有乜關係，不過見佢生日仲要開工，就放過佢啦！