政情：金勞詹突然起李卓人底
除咗互聯網有起底組之外，估唔到原來立法會都有起底組。金融服務界議員「金勞詹」詹培忠尋日喺辯論立法會產生辦法決議案時發言，不斷力撐功能組別有存在價值，本來唔係問題嘅，奇就奇在講講吓突然起埋職工盟李卓人底，大爆對方出身富裕家庭，仲質疑佢因為分唔到家產先至投身工運行列。
其他議員聽到後都呆晒，有公民黨議員舉手向主席投訴金勞詹違反議事規則，主席裁定金勞詹犯規，要佢收番言論。金勞詹唔知做乜咁好火繼續抗議，佢愛徒謝偉俊亦加入戰團，話主席對建制派好嚴、對泛民就鬆手。主席即時暫停會議，拉咗當事人入主席室密密斟，最後當然係金勞詹投降，返出來之後話係無心之失啦！
睇番資料，金勞詹已經唔係第一次喺立法會起人底。記得今年一月佢同社民連黃毓民喺立會火併，已經爆過料；今次又無喇喇開李卓人波，仲唔係名副其實起底組？金勞詹就解釋，自己真係冇惡意，只係唔抵得對方成日踩功能組別，所以拉佢落水喎。當事人李卓人又點呀？事發時佢根本唔喺場內，返嚟後一臉茫然唔知乜事！