政情：林D9風騷寸埋「戰友」
政府喺政改大戰中大獲全勝，政制及內地事務局局長林D9林瑞麟即時「一朝得志，語無倫次」，講嘢鬼咁風騷。話說自由黨主席劉健儀前晚發言時酸溜溜咁話，如果區議會改良方案係由自由黨提出，政府好有可能會請佢哋食「檸檬」，因為佢哋一早答應支持舊方案。
無安撫 劉健儀不滿
明眼人都睇得出啦，建制派喺呢次政改決戰中個心都有條刺，政府呢個時候好應該安撫呢班「親密戰友」，點知林D9唔單止冇冧番佢哋，仲加把口寸多句，真係估都估唔到。林D9話，劉健儀唔知點解成日都提到「檸檬」，如果繼續咁講，會令人誤會政府發咗牌畀政制及內地事務局開設茶餐廳，專做港式奶茶同檸檬茶喎。好心林D9講少句啦，呢啲咪叫「得意忘形」囉，依家咁講，唔止安撫唔到建制派，仲令劉健儀好唔滿意添。
劉健儀事後話，聽到林D9咁講，都有諗過要求對方澄清，但後來覺得林D9都係開玩笑，最後打消咗個念頭。除咗佢之外，啱啱退出白鴿黨嘅鄭家富都睇唔過眼，話林D9大權在握，之但係都要謙虛，唔好目中無人同數夠票就乜嘢都唔使理。林D9把口真係要收吓嘞，唔係第時冇晒朋友，再去立法會嘅時候畀人鬧奴才同閹人都冇人理。