政情：唔理白鴿有難 單雞隱形
喺二○一二年政改方案一役中角色關鍵嘅民主黨，因投支持票在外受社民連狙擊，對內亦有可能觸發退黨潮危機，真正係內憂外患，但大家有無發現，民主黨喺呢段苦日子中，唔見咗副主席單仲偕（
雞）呢？原來雞去咗南非睇世界盃。世界盃四年一度，雞不顧政改尚可體諒，但民主黨正值內外交困嘅時刻，雞仍然大安旨意留喺南非，音訊全無，令唔少白鴿黨黨員私下對呢位未來黨主席接班人頗有微言。
白鴿黨人多足球發燒友，雞係其中之一。半年前佢已經計劃一家四口去南非睇世界盃，當時雖然未知政改方案定喺六月二十三日表決，但都估到大約七月左右爆發大戰。政改係政壇大事，雞身為白鴿黨副主席，本來應該留守香港。不過，大家諗住佢唔係立法會議員，加上只負責黨務，於是無要求佢留港作戰。點知，過去兩個月形勢急劇變化，白鴿黨承受內外巨大壓力，時刻艱難，而雞就喺南非欣賞世界盃，引起唔少黨友微言。
一名不願具名嘅白鴿黨黨員話，政改大戰峰迴路轉，令提出「一人兩票」區議會方案嘅白鴿黨成為政治漩渦中心，尤其去到表決前幾日，更加成為社民連嘅箭靶，內部又爆出鄭家富退黨，「少壯派」施壓，正所謂內外交困，但係雞全程做隱形副主席，音訊全無，唔通睇世界盃仲緊要過黨嘅生死存亡？有黨員仲講笑話，等雞返嚟之後，黨高層應該對佢進行紀律聆訊，起碼要佢喺南非買晒啲世界盃紀念品返香港畀黨友賠罪。現時身處南非嘅雞如果睇到，唔該識做。
短訊耍冧：對不起弟兄姐妹
白鴿黨人罰雞買紀念品，雞最多荷包大出血，但咪輕視呢個黨內小風波，雞隨時要付上政治代價。眾所周知，雞係白鴿黨部署接替何俊仁做下任主席人選，依家搞出件咁嘅事，對佢嘅接任之路有冇影響，好難講㗎。雞要撲熄黨友怒火，睇嚟買世界盃手信唔可以咁孤寒嘞。
我哋尋日搵過雞，佢過咗幾小時後終於有覆來短訊，透過我哋向黨友耍冧。段短訊咁講：「我實在對不起弟兄姐妹。黨在最困難的時候，我不在港。」不過佢強調同兄弟「有短訊」溝通，言下之意打電話就免喇！