中環出更：黃宜弘娶新抱星光熠熠
立法會議員黃宜弘（ＩＱ博士）與太太梁鳳儀今日再做老爺、奶奶，事關佢哋嘅三仔群恩迎娶拍拖多時嘅女友吳啟華，喺尖沙咀洲際大酒店大排筵席，並邀請多位高官名人出席，包括保安局局長李少光、教育局局長孫明揚、行政會議召集人梁振英等，仲有中聯辦副主任周俊明，星光熠熠，ＩＱ博士認真夠面子。
遊艇載親家食海鮮
卓妮尋日致電恭喜ＩＱ博士娶新抱，佢表現得相當興奮，話自己心情好到不得了，尋晚仲出動太太送畀佢艘「Win Win雙贏」豪華遊艇，接載親家入南丫島食海鮮，大家飲得好高興，狂歡到九點先至回家休息，準備今日嘅婚宴重頭戲。ＩＱ博士話，完成婚禮後，明日會與親家一齊飛到上海玩兩日，之後大家各自各精彩，群恩兩公婆就去度蜜月。
群恩目前喺美國做醫生，啟華就喺Arizona State University（美國亞利桑那州立大學）做音樂教授，所以一直喺美國居住。點解回港擺酒結婚呢？ＩＱ博士解釋話：「我哋啲朋友多數喺香港，唔通要我哋咁遠路飛過去美國飲喜酒咩，梗係叫佢哋返港擺酒啦！」記得去年底ＩＱ博士七十一歲生日，群恩都帶埋女友回港賀壽，結婚咁大件事，就梗係順晒父母意思啦！